उज्जैन यात्रेसाठी महिला भगिनींना ओळखपत्र वितरण कार्यक्रम उत्साहात
महाराष्ट्र न्युज नेटवर्क
पुणे : शिवसेना (उद्धव बाळासाहेब ठाकरे) यांच्या वतीने आयोजित उज्जैन महाकाल यात्रेतील 3000 महिला भगिनींना ओळखपत्र वाटपाचा कार्यक्रम खडकवासला परिसरात मोठ्या उत्साहात पार पडला.
यावेळी पुणे शहर संपर्कप्रमुख आमदार सचिन अहिर यांनी खडकवासल्याचा “श्रावण बाळ” म्हणून ओळखले जाणारे संदीप मते पाटील यांचे विशेष कौतुक करत नागरिकांना त्यांच्या पाठीशी उभे राहण्याचे आवाहन केले.
अहिर म्हणाले, “संदीप मते यांनी खडकवासला व प्रभागात लोकाभिमुख उपक्रमांमुळे जनमानसात नेतृत्वाची स्पष्ट छाप निर्माण केली आहे. अशा युवा नेतृत्वाला जनतेचा आणि पक्षाचा मोठा आशीर्वाद मिळायलाच हवा.
आपल्या आशीर्वादाने खडकवासला प्रभागाला योग्य, परिश्रमी आणि जनतेसाठी झटणारा युवा नगरसेवक पाहायला मिळेल,” असा विश्वास त्यांनी व्यक्त केला. माजी महापौर स्नेहल आंबेकर म्हणाल्या, “कष्टकरी शेतकरी कुटुंबातील मुलगा संदीप मते समाजासाठी काहीतरी करत आहे, हे आपले भाग्य आहे. ते निश्चितपणे नगरसेवक होतील,” असे समर्थक मत त्यांनी मांडले.
आयोजक संदीप मते यांनी बोलताना म्हणाले, “महाकाल यात्रा हा माझा जनसेवेचा संकल्प आहे. पहिल्या टप्प्यात 3000 भगिनींना ओळखपत्र दिले असून, एकूण 10,000 महिलांना उज्जैन दर्शन घडवण्याचा मानस आहे.
आतापर्यंत 80 टक्के समाजकारण आणि 20 टक्के राजकारण या तत्त्वावर काम केले आहे. यापुढेही प्रभागातील जनतेसाठी समर्पित राहणार आहे.” कार्यक्रमाला आमदार सचिन अहिर, महिला संपर्कप्रमुख व माजी महापौर स्नेहल आंबेकर, राज्य संघटक वसंत मोरे, शहरप्रमुख संजय मोरे, गजानन थरकुडे, जिल्हाप्रमुख प्रकाश भेगडे, संजय काळे, माजी नगरसेवक काकासाहेब चव्हाण, माजी नगरसेवक बाळासाहेब धनवडे, ज्योती गाडे, अनिता इंगळे, भरत कुंभारकर, संतोष गोपाळ, अविनाश बलकवडे, रवी मुजुमले, बुवा खाटपे, पोपट चोरघे, डॉ. नंदकुमार मते, तृप्ती पोकळे, गोकुळ करंजावणे यांसह मोठ्या संख्येने पदाधिकारी व शिवसैनिक उपस्थित होते.
याच कार्यक्रमात ज्येष्ठ नेत्या लक्ष्मीबाई मते आणि शारदा मते यांनी शिवसेनेत प्रवेश करून पक्षाला राजकीय बळ दिले. कार्यक्रमाचे प्रभावी सूत्रसंचालन खडकवासला विधानसभा अध्यक्ष नितीन वाघ यांनी केले.
Latest Articles
